العناية الشخصية - تمرين تنظيف الاسنان Teeth brushing exercise

اذا كان هناك عادة جيدة يجب ان يتعلمها الطفل فى سن مبكرة .. بالتأكيد ستكون عادة تنظيف الاسنان

تدوينة اليوم ممتعة و شيقة عن ازاى نعلم الطفل ينظف اسنانه بنفسه

الادوات المطلوبة :

1- فرشاة اسنان مناسبة للطفل

2- معجون اسنان للاطفال

3- كوب ماء

4- وعاء

5- فوطة

6- مرآة

7- صينية لحمل الادوات

.
.
.

كيفية اداء التمرين :

1- نعلم الطفل ازاى يفتح انبوبة معجون الاسنان ببطء .. و يدوس عليها يخرج قطعة صغيرة مش اكبر من حجم البسلة المدورة الصغيرة دى .. عارفينها ؟؟ ^_^ 

مش زى الاعلانات ف التليفزيون يحطوا نص الانبوبة ع الفرشاة

2- ناخد القطعة دى بالفرشاة و ندعك اسنانا و احنا باصين فى المراية مش باصين للطفل 

3- نتمضمض بالماء اللى فى الكوباية و نخرج ماء المضمضة فى الوعاء الفارغ 

4- ننشف بالفوطة

5- دلوقت نسيب الطفل يعمل التمرين 

.
.
.

بعد ما الطفل يتقن التمرين و يتعود يعمله بنفسه

ماننساش نهيأ له حمام المنزل عشان يكون ملائم لاستخدامه

زى كده

.

.

.

فى بعض الانشطة اللى ممكن نعملها قبل ما نبدأ فى التمرين العملى اللى فات ده

عشان نساعد الطفل يعرف اهمية الموضوع ده اكتر و و كيفية عمله زى :

مثلا يتعلم كيفية دعك الاسنان و الضروس من الخارج و الداخل على المجسم ده 

.
.

فى ناس مشكورين زودوا كمان خيط الاسنان .. فيهم الخير ... كام واحد فيكم يعرف خيط الاسنان ده اصلا ^_^

و دى طريقة تانية لتعليم خيط الاسنان بردو .. اى خدمة

و دى اعتقد سهلة جدا بالمكعبات و صلصال او اى عجينة منزلية الصنعو خيط تخين

.
.

طبعا سؤال لولبى هايطرح نفسه دلوقت

المجسمات دى تتجاب منين

مش عايزاكم تقلقوا خالص

هانعملها بنفسنا مع اطفالنا من كرتونة بيض ^_^

نفس الفكرة بطريقة تانية

.
.
.
و ده معمول من علبة الكورن فليكس ملزوق عليها ورق ملون
و الجزء الابيض ده كرتون من الناعم اللى ممكن يتكتب عليه بأقلام السبورة و يتمسح

بنكتب عليها مثلا بقايا طعام ، جراثيم ، ....

و الطفل يمسحهم بالفرشاة

.
.
.

و دى فكرة مشابهة باستخدام الكرتون اللى هو White board
اللى بيتكتب عليه بالmarker ويتمسح بسهولة

.
.
.
دى حلوة اوى و سهلة
من القاعدة بتاعة الازايز البلاستيك !!
و الطفل يحاول يلونها كلها بالفرشاة
و بالتالى هو بيتدرب انه ينظفها من جميع النواحى

Plastic bottles buttoms
.
.
.
او ممكن الفكرة دى
ورق عادى ملون و ابيض
و تغمسى صباعك فى قهوة او كاكاو و تخلى الضرس مش نضيف كده
و الطفل ينضفه بالفرشاة

.
.
.

ممكن كمان نعمل الكروت دى و مطلوب منه يرتبها عشان يحفظ ترتيب خطوات تنظيف الاسنان

.
.
.

يعمل النشاط ده عشان يعرف ايه الحاجات الكويسة لاسنانه و ايه الحاجات المضرة

و ده شكل تانى

و ده شكل تالت " مش حرماكو من حاجة اهو ^_^ "

.
.
.

ده نشاط حلو اوى

ورق ملون تقصيه بالاشكال دى

و الطفل يستخدم الصمغ و الورق الاصفر عشان يلزقه بشكل الاسنان

بعدين يستخدم فرشاة الاسنان و الوان بيضا عشان يلونها

.
.
.

او يعمل لوحات فنية سيريالية - محدش يسألنى يعنى ايه سيريالية دى لانى ماعرفش - باستخدام فرش الاسنان بردو

.
.
.
او خلى الطفل يعمل نشاط يدوى زى ده
بخيط احمر و اسفنج او قطن ابيض و صمغ

.
.
.
و ممكن تفننوا مع بعض وقت الاكل
بالتفاح و عجينة السكر

.
.
.
و ده نشاط غرضه انه يعرف الطفل ان كل شخص فى البيت ليه فرشاة اسنان خاصة بيه و ماينفعش حد يستخدم فرشاة حد تانى

.
.
.

و دى بأة تجربة عملية ممتعة عشان يشوف فعليا أثر غسيل الاسنان

هاتسلقى بيض .. بعدين تنقعيه فى كوكاكولا لمدة خمس ساعات ع الاقل

هاتقعدى مع الطفل تفهميه ان القشرة بتاعة البيضة دى عاملة زى اسناننا بالظبط

و ان الطبقة الصفرا اللى اتكونت عليها زى الطبقى اللى بتتراكم على اسناننا

و تديله مراية يشوف اسنانه

تديله فرشة و معجون و تنظفوا البيضة

فى الاخر هايشوف النتيجة بعينه و الفرق بين قبل و بعد التنظيف

و ساعتها هايحس بأهمية تنظيف اسنانه

و دى نفس التجربة
بس استخدمت مرة كولا و مرة قهوة و مرة عصير

عشان يشوفوا انهى بيلزق اكتر ف الاسنان و بيخلى لونها اصفر

.
.
.
دى تجربة عملية تانية و سهلة
ادى الطفل قطعة شيكولاتة ياكلها و خليه يشوف اسنانه

خليه يتمضمض او يشب مية و يشوفها مرة تانية
هايلاقيها بردو مش نضيفة اوى

استخدمى قاعدة الازازة البلاستك و رشى عليها شيكولاتة سايلة
و خليه ينظفها بالفرشاة و المعجون

.
.
.

و ده فيديو تعليمى رائع للاطفال

" معلش هو بالانجليزى خلوا الطفل يشوفه و انتو ترجموله انا عارفة انتو ثقافتكو عالية ^_^ "

هاترجم شوية ع السريع كده و انتو استخدموا مخيلتكم ف الترجمة المناسبة بردو محدش هياخد باله ^_^

- دلوقت وقت تنظيف الاسنان

- ليه ننظف اسنانا ؟

- عشان نشيل الاوساخ و الجراثيم لانها بتؤذى الاسنان بتعمل خروم ف الاسنان بتخليها ضعيفة عشان كده مهم جدا نستخدم الفرشاة و المعجون كل يوم

و عشان اسنانا تفضل قوية .. احنا محتاجين نستخدم الفرشاة دقيقتين كل يوم الصبح و دقيقتين بالليل قبل النوم بالطريقة الصح

+ استخدم فرشاة اطفال لان حجمها مناسب

+ ضع معجون - بالفلورايد - فى حجم البسلة

+ افتح فمك جامد ، و ابدأ بالاسنان اللى ف مؤخرة الفم ، ادعكهم فى حركات دائرية خفيفة كلهم جوة و برة و فوق و تحت

+ اوعى تبلع المعجون لازم تتخلص منه هايوجع بطنك

- دلوقت خلصت استخدام الفرشاة ، استخدم خيط الاسنان ، بيساعد على ازالة بقايا الطعام من بين الاسنان و على طول اللثة ، ممكن تستخدمه مرتين ف الاسبوع

+ اقطع خيط اسنان بطول 18سم
+ لف الخيط على صباعك و امسكه كويس بايدك الاتنين

+ دخله بين اسنانك و حركة بالراحة و ماتخليهوش يحك فى اللثة خالص

+ لما الخيط يوصل عند اللثة .. اتنى الخيط و شده ناحية السن و ارفعه عشان يخرج معاه اى بقايا موجودة

- و عشان نحافظ على اسنانا صحية لازم ناكل اكل صحى ع الفطار و الغدا و العشا

- و لو احتجت وجبة سريعة ممكن تاكل تفاحة ، جزرة ، جبنة .. و ابعد عن المشروبات الغازية والحلويات

- لو عطشان اشرب ماية او لبن

- لو نظفت اسنانك بالفرشاة ، و استخدمت خيط الاسنان ، و أكلت اكل صحى

هايكون عندك ابتسامة جميلة طول حياتك 

ممكن تبحثوا ع اليوتيوب عن فيديوهات تانية مناسبة للناس اللى ثقافتها ألمانى او ايطالى و كده يعنى ^_*

.
.
.
و دى لعبة ممكن تنزلوها ع الايباد او الموبايل و الطفل يلعبها 
عن تنظيف الاسنان 
و ممكن تبحثوا عن العاب تانية مناسبة

للتحميل من هنا
.
.

الى هنا انتهت تدوينة اليوم

اراكم لاحقا فى تدوينة اخرى ان شاء الله :)

و كالعادة .. اسعد بتعليقاتكم و لايكاتكم و شيركم ^_^

انهى اكتر فكرة عجبتكم و قررتوا تنفذوها ان شاء الله ؟

.
.
.

ملحوظة 

دروس العناية الشخصية هى احد اقسام التعليم الحركى فى مدرسة منتسورى

للتعرف على باقى الاقسام يمكنكم زيارة هذا الموضوع

من هنا