السلام عليكم و رحمة الله و بركاته
لا شك ان اللعب بالماء ، الرمل ، الصلصال ، الالوان ... و غيرها من الانشطة الحرة تمثل وقتا ممتعا جدا للطفل
بجانب انها مهمة جدا لتنمية الحس الابداعى لديه
اليوم انقل لكم تجربة مميزة لصديقتى أميرة مع ابنتها ريتال " سنتين و 5 اشهر "
فى صنع عجينة اللعب منزليا
ارجو ان تستفيدوا منها
.
.
.
أميرة تحكى لكم :
Playing dough
اللعب بالعجين
النهارده كنت زهقانه اوي وبصراحه مجيتش جنب المطبخ ولا شغل البيت خالص وريتال كمان كانت عماله تزن وحاسه انها زهقانه جبتيلها الصلصال وعرضت عليها اللعب بتاعتها مرضيتش وفضلت تزن برضه فقلت نعمل حاجه جديده
واكتر حاجه ممكن تعجب اي طفل (العجين)
فقررنا بدل الصلصال اللى زهقت منه نعمل احنا عجين تلعب بيه ونلونه بالألوان اللى تحبها واليكم ماحدث ههههه :
اول حاجه جيبنا الجليتر
وبعدين الوان الطعام :
اللى لقيته متوفر عندي الأحمر والأصفر والأخضر والبني
وبعدين قلنا هنعمل العجين ومقاديره كالتالى :
2 كوب دقيق
¼كوب ماء
ملعقة زيت زيتون
ملح
وحطينا المقادير في طبق كبير للعجن وعجناه بالشكل ده
ومنستش طبعا اجيب طبق تاني لريتال عشان تعجن فيه والا مكنتش سابتني اعجن اصلا ^_^
وبعدين جبنا طبق صغير وحطينا فيه لون طعام ونقطة ميه وجليتر نفس اللون
وعجنا بيهم كوره من الكور اللى قسمناهم من العجين وطلعت بالشكل ده
وهكذا كررنا الموضوع مع كذا لون وخففنا الألوان وتقلناها عشان يبقا عندنا درجات الوان
وفوسط ماحنا بنعمل رحت بس دقيقه اغسل ايدي ورجعت لقيت ريتال تعاملت مع الموقف بالمنظر ده
اللى لفت نظري انها اختارت 3 الوان درجات متناسقه عشان تعجنهم بالشاكوش وهما (البرتقالى والأصفر والبني ) مع كان ادامها الوان تانيه بس هيا اختارت الالوان التلاته دول يعني الطفل عنده حس فني بالألوان ودرجاتها ومش بيختار عشوائي كده وخلاص ..
انا طبعا سيبتها تلعب براحتها خالص حتى لو بهدلتهم كلهم لأن الغرض من الموضوع انها تتفاعل وتعمل كل اللى يخطر على بالها بحريه تامه ..
ده العجين اللى عملناه واللى ريتال عجنته مع بعضه في الاخر
وبعد ماخلصت لعب خالص وشبعت وقامت جبت كيس وغلفت فيه العجين بالشكل ده عشان اخزنه للمره الجايه
وجبت علبة من علب حفظ الطعام اللى عندي وحطيتهم فيه
طبعا لو هاستخدمهم في وقت قريب مثلا كام يوم او اسبوع هاسيبه في التلاجه عادي ولو هاستخدمه بعد فتره كبيره يبقا يتحط في الفريزر ويطلع قبلها بساعه عشان يفك
بصراحه كان يوم حلو اوي رغم اني لما دخلت المطبخ بعدها اتخضيت من شكله بس استمتعنا انا وريتال جدا بالألوان واللعب واكتشفت اننا لازم نحط ادام الطفل الوان كتيرودرجات مختلفه من نفس اللون عشان هو بيحب يجمع الألوان المتناسقه ...
#Amirasa3d
.
.
.
الى هنا تنتهى تدوينة اليوم
.
.
الى هنا تنتهى تدوينة اليوم
تابعوا صفحة المدونة على الفيس بوك للمزيد من الافكار و الانشطة و النصائح التربوية
و يسرنى الاطلاع على انشطتكم مع اطفالكم دائما .. يسعدنى تواصلكم
دمتم فى امان الله