6 أسئلة أجيب عنها دفعة واحدة هنا نظرًا لكم الرسائل والتعليقات بخصوص هذا الموضوع:
1 - هل حمزة مسجل بالسفارة نظام لغات أم عربي؟
حمزة مسجل بنظام ابناؤنا في الخارج بالسفارة، لغة عربية وليس لغات
بمعنى أنه يدرس المناهج ويختبر فيها باللغة العربية
--------------------------------------------------
2 - بتذاكروا العلوم والحساب بالعربي ولا الإنجليزي؟
بأقدم الدرس لأول مرة باللغة العربية ونعمل عليه أنشطة باللغة العربية، وأطلب من حمزة يشرحه باللغة العربية عشان أتأكد من فهمه واستيعابه له وقدرته على التعبير عن المعلومة، بعدين بأقدم له المصطلحات الإنجليزية المتعلقة بنفس الدرس كنوع من إثراء الحصيلة اللغوية الإنجليزية مش أكتر
مثال في العلوم:
اتعلمنا تصنيف الحيوانات الفقارية والصفات التشريحية لكل قسم منها وعملنا عليها أنشطة وكان حمزة شرحها في الفيديو ده
http://bit.ly/Vertebratesclasses
بعدين مؤخرا سمعنا الدرس باللغة الإنجليزية من موقع Mobymax – هاكتب عنه في منشور منفصل إن شاء الله- واستخرجنا المصطلحات الإنجليزية وعملنا الخريطة الذهنية اللي كنت نشرتها في الستوري من فترة
مثال في الرياضيات:
اتعلمنا الأشكال الهندسية باللغة العربية، مفهوم الأضلاع والرؤوس والزوايا، وحلينا عليها باللغة العربية، وبعدين اتعلمنا المصطلحات الإنجليزية المقابلة ليها
بالتالي اللغة الإنجليزية بالنسبة لنا هي لغة ثانية بنتعلمها مش لغة للتعلم بنتعلم بيها
وبالتالي بردو طبيعي إن الطفل لما يقرأ المعلومة بالإنجليزي هايفهمها عادي ويقدر يرد لو حد سأله عنها
يعني مش معنى إننا بنتعلم عربي إننا مهملين الإنجليزي، لأ بنهتم بتعلمه وإتقانه كلغة
-------------------------------------------------------
3 - طيب ده كده مش بيمثل ضغط على الطفل؟ طالما كده كده هايدرس بالإنجليزي ما يدرس لغات وخلاص؟
علميًا، الطفل بيستقبل معلومات ويستوعبها ويحللها ويعبر عنها أفضل بلغته الأم، اللغة الأم هي اللي بتمتلك تشابكات ووصلات عصبية أكتر في مخه، فطبيعي يعتمد عليها في التعلم، خصوصًا في السنوات الأولى من عمره، ولذلك هاتلاقي أي طفل بيدرس منهج لغات بيطلب ترجمة المعلومات بالعربي الأول وبعدين يحاول يحفظها ويعبر عنها بالإنجليزي
لذلك أنا مسجلة حمزة عربي، لأن هي دي لغة تعلمنا، وهي دي اللغة اللي هايكون مطلوب منه يعبر بيها في الاختبارات، مش محتاجين نزود الضغط على الطفل بإننا نخليه يستقبل ويعبر بلغة مش بتاعته
احنا آه بنتعلم نفس المعلومات بالإنجليزي، لكن مش مجبرين نتعلم المنهج كله بالإنجليزي، ولا مجبرين نعبر عنه ونحل عليه كله بالإنجليزي، الموضوع اختياري بالنسبة لنا وأقدر أزود أو أنقص فيه على حسب استعداد طفلي وقدراته
-------------------------------------------------------
4 - طيب ليه أحيانًا بتلاقوا صور فيها مسائل حسابية بالإنجليزي على بروفايلي؟
أنا مش هاتكلم عن أصل الرموز ومين فيها أصلها عربي وأصلها هندي، عشان ده موضوع كبير
ولكن عن نفسي باستخدم الرموز اللي يقال إنها إنجليزية دي لأن ببساطة كل الأدوات عندي والكتب والمواقع المساعدة بتكون بالرموز دي، فكان الأسهل بالنسبة لي إني أستخدمها حتى وأنا باشرح الدرس باللغة العربية، مادة الحساب تحديدًا هي حالة خاصة، لأن المفاهيم الرياضية مش هاتختلف باختلاف الرموز المستخدمة
لما أحسب زاوية مثلث أ ب ج هاتطلع نفسها لو المثلث اسمه abc
ولما يجمع 2+4 بالعربي هي نفس العملية اللي هايعملها ف دماغه لما تكون 2+4 بالانجليزي
نفس ترتيب الآحاد والعشرات والمئات، نفس علامة أكبر من وأصغر من، نفس كل حاجة تقريبًا
وأحب أنوه عن حاجة
ده اختيار شخصي ليا، غير ملزم لأي حد إنه يعمله، أنا لقيت إن ده أنسب لظروفي وللموارد المتاحة عندي ف عملت كده، ممكن انتو تتوفر عندكو أدوات وكتب بالعربي فتستخدموها عادي
-------------------------------------------------------
5 - طيب ما الإنجليزي هو لغة العلم والأبحاث حاليًا، يعني الأفضل إن الطفل يتعلم بيها من دلوقت عشان يقدر يواكب المجتمع بعدين؟
احنا ما ينفعش نجبر اليرقة تتغذى على رحيق الأزهار بدعوى إنها كده كده هاتتحول لفراشة وهايبقى هو ده غذائها بعدين!
كل مرحلة لها احتياجاتها ومتطلباتها، اليرقة وهي صغيرة محتاجة تتغذى على أوراق الشجر عشان تكبر بشكل سليم، وتتحول لفراشة سليمة وقوية
الطفل وهو صغير محتاج يتعلم بالطريقة اللي مخه مؤهل أكتر ليها، عشان يكبر بشكل سليم، ويتحول لشخص بالغ سليم وقوي
مش معنى إن طفل بيتعلم بالعربي وهو صغير، إنه مش هايعرف يتعامل مع الإنجليزي وهو كبير
الجامعات مليانة طلبة خريجين عربي وبيدرسوا علوم مختلفة باللغة الإنجليزية عادي جدا –وأنا منهم- ومش المقياس أبدًا مين كان عربي ومين كان لغات، ولكن مين يمتلك إنجليزي كلغة ومين لأ، لأن مش كل اللي بيتعلم في مدارس لغات بيقدر يستخدم الإنجليزي كلغة أصلًا
------------------------------------------------------
6 - طيب احنا مقتنعين بالكلام ده جدًا بس وضع المدارس بيحتم علينا إننا ندخل الأطفال لغات، نعمل إيه؟
بغض النظر عن إن المدارس اللغات والانترناشيونال حاليًا مش جنة يعني، ومصائبها كتير وكله بقى محصل بعضه
لكن أنا ماقدرش أقولكم تعملوا إيه، كل واحد أدرى بظروفه، وأدرى بأولوياته، أنا بأقول المعلومة اللي عندي اللي ممكن تساعدكم وانتو بتاخدوا قراركم، لكن ماقدرش آخد قرار نيابة عن حد