غرفة نوم الطفل Toddler bed room

3:20 ص دعاء مجدي 0 Comments

انهردة ان شاء الله هنعرف مع بعض ازاى نصمم غرفة نوم لطفل بداية من 6 شهور فيما فوق .. اعتمادا على مبادىء مدرسة منتسورى

و انا باقول بداية من 6 الشهور لان ده السن اللى الطفل بيبدأ يتحرك فيه و يزحف

لكن قبل كده بتكون كل حياته ف السرير او مكان ما بنحطه

و بجانب ان غرفة الطفل لازم تكون فيها الوان مبهجة ، نظيفة و منظمة

ف احنا عندنا 9 حاجات فى غرفة الطفل بتشغل تفكيرنا عند تصميمها .. و هى كالآتى :

.
.

ملحوظة : لو فى اى صورة صغيرة دوسوا عليها عشان تشوفوها مكبرة

1- السرير

اول ما يبدأ الطفل ف الحركة لازم نستغنى عن سرير الطفل ذو الحواجز الجانبية لان ده بيعيق حرية الطفل ف الحركة

و عوضا عن ذلك

بنستخدم فقط المرتبة موضوعة على الارض

اولا عشان امان الطفل لما يتقلب ما يقعش يتخبط جامد

ثانيا عشان يقدر ينزل و يطلع من عليها بسهولة وقت ما يصحى و وقت مايحب ينام

و ده بيعزز اعتماده على نفسه

مع الاخذ ف الاعتبار مانحطش مخدات و ألحفة للسن اقل من سنة لتجنب خطر الاختناق و بنكتفى فقط بالملايات و البطاطين الخفيفة

و دى بعض الافكار اللى ممكن تستعينوا بيها و اللى معمولة فعلا فى غرف اطفال منتسورى

2- الاشياء المعلقة فوق السرير او فى انحاء الغرفة

و دى مهمة من ساعة مايتولد كمان مش من سن 6 شهور

بتجذب انتباهه بحركتها و درجات ألوانها لو ملونة او تباينها لو ابيض و اسود

و ده بيعمل استثارة بصرية بينمى الحس البصرى عنده

سهلة جدا تعملوها بنفسكو مش لازم جاهزة

و تتغير كل فترة بعد ما الطفل يمل منها

و اللينك ده فيه افكار كتير اوى للتعليقات دى

اضغط هنا

هنا ايضا

3- المرايا

طبعا ده جزء بنغفله كتير فى غرف الاطفال

مع ان المرايا هى الصديق الصدوق للطفل

بيتابع فيها نفسه و حركاته و التطورات اللى بتحصله

المرايا اكبر عامل جذب للاطفال

بتتحط ف الغرف على ارتفاع منخفض للغاية مناسب للطفل و بعرض كبير تغطى اغلب عرض الحائط

و دى بعض الافكار المنفذة فعلا

" و الصور بتاعة السراير اللى ف اول التدوينة فوق فيها بردو افكار مرايات"

4- الارفف

فى غرف اطفال منتسورى بنتستغنى عن فكرة صندوق او سلة الالعاب اللى بتتقفل عليها

و صعب ع الطفل الصغير يتعامل معاها و مع محتوياتها بسهولة

عوضا عن ذلك بنستخدم وحدات أرفف قصيرة مناسبة لطول الطفل

بنحط عليها بعض الالعاب مرتبة بشكل حلو و كل فترة بتتغير بالعاب تانية من المخزنة عندنا و نرجع نبدلها تانى بعدها بفترة و هكذا

طبعا الارفف دى بتخلى الطفل يعتمد ع نفسه ف اختيار ألعابه و تديله احساس بالاستقلالية انه عارف يدير شؤونه بنفسه

و دى بعض الافكار ممكن تفيدكم

5- البراويز او الاعمال الفنية

بنبتعد عن الصور التقليدية للشخصيات الكرتونية الشهيرة

و عوضا عن كده بنستخدم صور مناظر طبيعية او رسومات بسيطة معبرة عن فكرة ما

و اهم حاجة انها بتتعلق على ارتفاع منخفض ف مستوى نظر الطفل

زى كده

6- اثاث مناسب لحجم الطفل

زى ترابيزة و كرسى لما يحب يلعب او يرسم او يلون او ياكل بنفسه

و زى كرسى ده للقراءة

يعنى نحط له حاجات مناسبة لحجمه يستخدمها بنفسه و يحس بالاستقلالية

7- مساحة كافية للعب و الحركة

فى غرف منتسورى بنبعد تماما عن زحمة الاثاث

احسن حاجة البساطة و الفاعلية

و وجود مساحة كافية ده بيعطى حرية تحرك احسن للطفل و كمان افضل من ناحية الامان انه مش هايتخبط و يتكعبل كل شوية ف الاثاث

المساحة دى ممكن نفرشها بالمطاط زى كده

او سجاد طرى زى كده

عشان لو الطفل وقع ما يتخبطش جامد

بصوا هنا الغرف دى بيكون اغلب مساحتها فاضى ازاى

8- ألعاب الطفل

معظم ألعاب منتسورى - ان لم يكن كلها - بتكون مصنعة من خامات طبيعية - خشب فى الغالب - و ده لسببين

اولا عشان يربط الطفل بالطبيعة و البيئة ف كل حاجة

ثانيا ان الالعاب الخشبية بتبدوا أقيم فى جودتها و شكلها و ده بيخلق عند الطفل مشاعر التقدير للعبة دى فيحافظ عليها و يتعامل معاها بحرص على عكس الالعاب البلاستيكية

و دى بعض الالعاب المناسبة حسب السن :

الطفل الصغير خالص مش بيحتاج اكتر من كام لعبة طرية اللى بتكون محشية دى يقدر يمسكها بنفسه بتكون خفيفة عليه