عنى و عن المدونة
بعد ماتخرجت من كلية الصيدلة .. و بعد حياة مليئة بالنجاحات و الانجازات الفظيعة اللى مالهاش اى لزمة ..
بداية من انى اطلع من العشرة الاوائل ف مدرسة اكيد محدش فاكرنى فيها دلوقت ،
مرورا بشهادات التكريم المختلفة اللى بتتعمل عند اى مكتبة بنص جنيه ،
انتهاءا الى تخرجى بتقدير امتياز مع مرتبة الشرف ، مرتبة اتركنت جمب بقية الشهادات ام نص جنيه انام قريرة العين على مرتبة غيرها ،
فى النهاية ماحستش باى فرق بينى و بين قبيلة " عادى بن عادى العادى " اللى كلها ناس عاديين عاشوا حياة عادية و هايموتو موتة عادية .. عادى يعنى
بس الحمد لله .. جت المعجزة و ربنا رزقنى بهدية خلت حياتى مش عادية
<3 حمزة <3
ايام قليلة ان شاء الله و يتم 6 شهور من ايام حياته اللى مش
عايزاها تبقى عادية ، مش عايزاه ينضم لقبيلة العاديين
و بما أن " يا هناه يا هناه اللى يتعلم عندنا " – حمزة نمرة ستايل
و حيث أن " انا عايزة اربى عيالى احسن تربية و اعلمهم احسن تعليم " – الأم المصرية الاصيلة ستايل
لذا و لذلك و لهذا .. قررت اعمل المدونة دى عشان اعرفكم على الاختراع العظيم بعد البحث و الفحص و التدقيق و التمحيص .. ألا و هو " نظام منتسورى التعليمى "
نظام كده مطبق فى دول كتير من زمان ، هو مش قديم اوى يعنى يا دوب من حوالى 100 سنة كده ، بس لسة ماوصلناش هنا عشان فرق التوقيت مش اكتر ^_^
نظام كده لما تشوفوه و بعدها تفتكروا الايام الخوالى اللى عشناها و احنا صغيرين هاتصعب عليكو نفسكو هههههههه
و لأنى لقيت المحتوى العربى على النت ضعيف جدا فيما يخص النظام ده سواء مواقع او كتب او تجارب او اى حاجة ، فانا عملت المدونة دى عشان انقلكم خبراتى و معلوماتى الجمة الفذة بخصوص النظام " دهون " .. و اللى جمعتها من مواقع و كتب و مدونات اجنبية ..... الخ
و طبعا لازم و حتما و لابد احط التاتش بتاعى .. عشان كده كل ما اجرب و اطبق حاجة مع حمزة ان شاء الله هاجى اقولكم على طول و اشارككم تجاربى الناجحة نجاح فظيع ، و مش هاخبى عليكم بردو التجارب الفاشلة فشل ذريع .. احنا اخوات بردو و ادينا بنتعلم ^_^
المدونة ان شاء الله هاتتكتب باللغتين العربية و المصرية LOL ... و مفيش مانع بردو من شوية انجليزى كده عشان الأقلية الانجليزية حول العالم مايحسوش بس بالاضطهاد و العنصرية - جوجل مش هايعرف يترجم الجملة اللى فاتت دى صح ؟ احم احم - .. و ربنا يقدرنا على فعل الخير ^_^
ماتنسوش تتابعوا جديد المدونة على الE-mail أو الfacebook و على Pinterest و عملتلكم فى المدونة خدمة RSS كمان ... مش حرماكو من حاجة اهو ^_^ و هاكون سعيدة أكيد باستقبال تعليقاتكم و استفساراتكم على المدونة
