1- تمرين الاسطوانات ذات المقبض Cylinder blocks

8:42 م دعاء مجدي 0 Comments

التدوينة دى ان شاء الله فيها شرح مفصل و وافى و كافى
لاول أداة تعليمية فى التعليم الحسى فى مدرسة منتسورى هى
الاسطوانات ذات المقبض
Cylinder blocks



مناسبة للطفل بداية من عمر 2.5 - 3 سنوات فيما فوق

التكوين : " حسب السهولة بالنسبة للطفل كالآتى"

القطعة الاولى : عشر اسطوانات ذات مقبض كلهم نفس الطول لكن مختلفين فى القطر يعنى يتراوحوا بين "سميك – رفيع"




القطعة الثانية :عشر اسطوانات ذات مقبض مختلفين فى الطول و فى القطر
 القطر يزيد و الطول يزيد



و بالتالى بيتراوحوا بين " كبير و صغير " لان التغير ساعتها بيكون فى الحجم الكلى




القطعة الثالثة: عشر اسطوانات ذات مقبض مختلفين فى الطول و فى القطر
 القطر يزيد و الطول يقل






القطعة الرابعة : عشر اسطوانات ذات مقبض كلهم نفس القطر لكن مختلفين فى الطول يعنى بيتراوحوا بين " طويل قصير "

.
.
.



طريقة التمرين :

- الطفل يخرج الاسطوانات من مكانها و يلخبطهم بحرص من غير ما يعمل صوت عالى و ازعاج و يحاول يرجعهم تانى مكانهم بالترتيب الصحيح ، بيكون قاعد فى وضع مريح على ترابيزة صغيرة قدامه او على الارض



- الطفل فى البداية هايعمل تجارب ممكن يحط اسطوانات فى اماكن مش بتاعتها ، هانسيبه مش هانتدخل خااالص ، هو هايكتشف الغلط بنفسه لما يلاقى ف الاخر اسطوانات مالهاش مكان تتحط فيه و هايراجع نفسه و يغير ترتيب الاسطوانات لحد ما يوصل للترتيب الصحيح ... و دى ميزة الاداة التعليمية دى ، ان هى نفسها بتخلى الطفل يكتشف اذا كان هو عمل التمرين صح او غلط مش محتاج حد يوجهه ، و رغبة الطفل انه يشغل مخه و يوصل للنتيجة الصح اللى عايزها هى اللى بتخليه يواصل التمرين من غير تشجيع من حد... و هو ده بالظبط " التعليم الذاتى" اللى بتدعو ليه مدرسة منتسورى


- التمرين ده بيجذب انتباه الاطفال جدا لدرجة ان بعض الاطفال ف مدرسة منتسورى قعدوا يعيدوه من نفسهم لحد 40 مرة !


- بعد ما الطفل يتقن التمرين على اول قطعة نبدأ نديله القطعة الاصعب اللى بعدها و هكذا

- و بعد ما يخلص الاربع قطع نبدأ نخليه يتمرن على قطعتين مع بعض ف نفس الوقت 


 ثم ثلاث قطع 


 ثم اربع قطع



بعدين يتمرن على قطعة واحدة و عينه مغمضة بتكون اصعب ، بعدين قطعتين ثم تلاتة ثم اربعة و هكذا





بعد ما يخلص كل التمارين دى بأة هاننقل على أداة تعليمية تانية و هى البرج الوردى و هانزله فى تدوينة منفصله ان شاء الله
.
.
.
 
الفيديو ده بيوريكم ازاى تقدموا التمرين ده للطفل

اللى عاملة الفيديو دى اشتغلت كمعلمة فى مدرسة منتسورى سنين طويلة يعنى خبيرة فى المجال

بتقول فى الفيديو
ان و احنا بنورى الطفل الاداة دى ممكن ننمى اللغة ف نفس الوقت ...بإننا نمسك مثلا اطول و اقصر اسطوانة و نشاورله فقط و احنا بنقول
طوييييل – قصييير و نكررها تلات مرات

بعدين نسأله : ايه ده؟ فيرد يقول طويل ، طيب ايه ده ؟ فيرد يقول قصير

بعدين نسأله تانى عشان نتأكد : ممكن تشاورلى فين الطويل ؟ ف يشاور عليها ، ممكن تشاورلى فين القصير ؟ ف يشاور عليها
و نفس الكلام مع السميك و الرفيع و مع الكبير و الصغير
ما عدا القطعة التالتة فقط مش هاينفع تفرقوا فيها .. لان اللى سميكة طولها كبير و اللى رفيعة طولها قصير ف مش هاتقدروا تقولو دى كبيرة و دى صغيرة

.
.
.
 
فائدة التمرين :

     1- بيدرب ايد الطفل على الحركة الدقيقة انه يمسك مقبض الاسطوانة باصابعه التلاتة " ابهام و سبابة و وسطى " و يدخلها فى الفتحات الصغيرة اللى فى الصندوق الخشبى بتاعها و ده يعتبر إعداد غير مباشر للكتابة  و مسك القلم

2-  و بيدرب عضلات الايد كمان اثناء حركة خلط الاسطوانات بحرص

3-  بيتعلم  كلمات جديدة " طويل- قصير – سميك-رفيع – كبير – صغير"

4-  بتعلم الطفل انه يفرق بعينه الاختلاف فى الابعاد ، لانه بنهاية التمرين بيكون قادر انه بعينه فقط يتعرف بسرعة على الفتحة اللى تلائم الاسطوانة اللى ف ايده

       5- الطفل فى التمرين ده بيدرب نفسه انه يلاحظ و يقارن و يحكم و ياخد قرار بناءا على اسباب هو شايفها

6- اعادة التمرين مرارا و تكرارا ده بينمى تركيز الطفل و ذكاءه
.
.
.
.
 
بالنسبة للاطفال اقل من سنتين و نص
ممكن نقدم لهم التمرين ده فى شكل مبسط منه لعبة مسلية و منه تمرين

زى كده مثلا مناسب لسن 6 شهور لحد سنة



و ده مثلا لسن سنة فيما فوق



تم بحمد الله :)
.
.
.

تمرين الاسطوانات ذات المقبض هو احد تمارين التعليم الحسى فى مدرسة منتسورى
للتعرف اكثر على تمارين التعليم الحسى


.
.
لو فى اى حاجة مش مفهومة او اى استفسار هارد عليه ان شاء الله فى التعليقات
" رجاء ذكر المصدر عند نقل الموضوع "






إجمالي مرات مشاهدة الصفحة