التعليم الحركى فى مدرسة منتسورى Motor education
اليوم ان شاء الله هانتكلم بالتفصيل عن التعليم الحركى فى مدرسة ماريا منتسورى
و الكلام ده نقلا عن كتابها " Dr/ Montessori's own handbook " ... و الترجمة بتصرف طبعا :)
مدرسة ماريا منتسورى مكانتش زى اى مدرسة سواء فى شكلها او فى منهجها
تقسيمة الحجرات زى البيت .. صالة - حجرة طعام - حمام - مطبخ - حجرة العاب .... و هكذا
و كل الاثاث اللى جواها حجمه صغير مناسب للطفل بداية من الشماعة اللى جمب الباب القصيرة عشان يقدر الطفل يعلق عليها الجاكيت بنفسه و حتى الاحواض و الحنفيات فى الحمام
عشان كده الطفل كان بيحس انه موجود فى بيئة مناسبة ليه و بيكون سعيد انه عارف يتعامل و يتكيف معاها دون جهد مضاعف
و وقتها هايكون معظم تركيزه على تنمية مهاراته العقلية لان المهارات الحركية بيتعلمها بسهولة فى المكان ده
الميزة كمان فى بيت الطفل ده انه مش متقسم على حسب سن الطفل زى التعليم العادى
بيتقسم كل فئة عمرية مكونة من تلات سنوات مع بعض
مدرسة ماريا منتسورى كانت معمولة ف الاصل لسن 3-6 سنوات و كانوا كلهم مع بعض ف مكان واحد
و ده ليه ميزة مهمة ان الاطفال الاصغر بيتعلموا من اقرانهم الاكبر منهم اسرع و كمان ده بينمى مهارات القيادة عند الاطفال الاكبر و بينمى احساسهم بالمسؤلية ناحية زملاءهم الاصغر منهم
التعليم الحركى و تدريب عضلات الطفل فى بيت الطفل ده كان بيشمل الآتى :
1- الحركات الاساسية اليومية زى ازاى يمشى و يقعد و يطلع و ينزل و يمسك الاشياء " حاجة زى الاتيكيت كده يعنى ^_^ "
2- العناية الشخصية بنفسه
3- ادارة محتويات المنزل اللى هو فيه
4- البستنة او التشجير " يزرع نباتات يعنى و يراعيها " و ده بيعلمه انه يهتم بالبئية اللى حواليه
5- أعمال يدوية
6- تمارين رياضية
7- حركات ايقاعية
هانتكلم بسرعة عن حاجة حاجة ...
.
.
.
.
.
1- الحركات اليومية
The primary movement of every day
The primary movement of every day
المعلمة فى بيت الطفل بتعلمهم كل حاجة عن طريق " القدوة " يعنى هى تعمل و هم يشوفوها و يعملو زيها ، مش عن طريق التلقين
بتعلمهم ازاى بعد ما يقوموا من على الكرسى يرجعوه مكانه ، ازاى يحضروا مائدة الطعام ، ازاى ياخدوا حاجة و يرجعوها مكانها ، ازاى يستنى دوره مايتعداش زميله و هكذا
و الاطفال كانوا بيعملوا كده و هم مبسوطين باحسساهم بالمسؤلية و الاستقلالية
.
.
.
.
.
2- العناية الشخصية
The care of the person
The care of the person
دى غرضها ان الطفل يتعلم يعتمد على نفسه و يعمل كل حاجة تخصه دون مساعدة و تدخل الام
يعنى اول درس بيتعلمه الطفل فى العناية الشخصية مثلا بيكون عن طريق اداة اسمها Dressing frames يعنى اطارات اللبس
بتكون قطعة من الملابس مثبتة فى اطار خشبى بيتعلم عليها الطفل ازاى يلبس و يخلع ملابسه بنفسه
.
.
.
.
.
3- ادراة محتويات المنزل
Management of household
الاطفال فى بيت الطفل كان عندهم نظام يومى .. اول ما يروحو بيغسلوا ايدهم و وشهم و اسنانهم
بعدين يمسكوا " زعافة " يشيلوا بيها التراب من ع الحيطان - اه عندهم زعافة زيينا ^_^ - و يمسكوا قماشة يلمعوا بيها الاثاث ، و جردل و ممسحة و يمسحوا الارض ، و يرتبوا كل اجزاء بيتهم الصغير ده
و طبعا كل الادوات اللى بيستخدموها دى كانت صغيرة مصممة خصيصا مناسبة لحجمهم
و فعلا الاطفال كانوا بيعملو كل ده و هم مبسوطين انهم عارفين يهتموا بالبيت بتاعهم
و كل يوم بيتعلموا حاجة بأة مثلا ازاى يصبوا سوائل من اناء لاناء ، او ازاى ينقلوا مواد صلبة من مكان لمكان ، وهكذا
.
.
.
.
.
4- البستنة او التشجير
Gardening
و دى كانت عامل جذب و سعادة كبير جدا للاطفال ان يكون عندهم حاجة حية هم بيراعوها و مسؤلين عنها و بيتابعوها كل يوم و هى بتكبر زيهم
فاكرين ايام الحلبة و الفول و البصل و الجزر دى ؟ ^_^
بستنة دى ولا مش بستنة يا متعلمين يا بتوع المدارس ؟؟ ^_^
.
.
.
.
.
5- الاعمال اليدوية
Manual work
Manual work
فى مدرسة ماريا منتسورى كانوا مختارين اعمال الفخار يتعلمها للاطفال كانوا بيعملوا اشكال و يدخلوها الفرن عشان تجمد و هكذا
كمان كانوا بيتعلموا ازاى يرصفوا الارض بالبلاط ، و ازاى يبنوا بيت صغير للدواجن ...
متخيلين ان اطفال عندهم 3-6 سنين كانوا بيعملوا كده فعلا !!
.
.
.
6- التمارين الرياضية
Gymnastic exercises
Gymnastic exercises
اول درس كانوا بيتعلموه الاطفال هو المشى على الخط .. اللى هو يماثل السير على الحبل بس الخط ده بيكون مرسوم ع الارض عشان سلامتهم
و ده بيعلم الطفل انه يحفظ توازنه و ينسق بين اوامر مخه و حركة رجله
بعدها بأة بيجى تمارين تانية لتقوية عضلات الايد و و بقية الجسم هكذا
.
.
.
.
.
7- الحركات الايقاعية
Rhythmic movement
بتكون شبه التمارين الرياضية كده بس بتتعمل مع ايقاع موسيقى شغال
ف مثلا لما الايقاع يكون بطىء حركة الاطفال تكون بطيئة و لما يسرع الايقاع هم كمان يسرعو و هكذا
ف هنا بيزيد مؤثر خارجى على حاسة السمع ف بيتعلم الطفل انه يوازن بين سمعه و حركته و اوامر مخه
______________________
كده احنا اتكلمنا عن التعليم الحركى مقصود ايه بيه
و ان شاء الله هانزلكم الدروس - المنهج التفصيلى - لكل جزء و ازاى تطبقوه مع اطفالكم فى تدوينات قادمة
تابعونى :)
ملحوظة :
التعليم الحركى هو احد اقسام التعليم الذى تهتم به مدرسة منتسورى
للتعرف على بقية الاقسام برجاء زيارة هذا الموضوع
نبذة مبسطة عن طريقة منتسورى فى التعليم
ملحوظة :
التعليم الحركى هو احد اقسام التعليم الذى تهتم به مدرسة منتسورى
للتعرف على بقية الاقسام برجاء زيارة هذا الموضوع
نبذة مبسطة عن طريقة منتسورى فى التعليم
