الفترات الحساسة للتعلم Sensitive periods for learning

10:00 م دعاء مجدي 0 Comments

د/ ماريا منتسورى من خلال متابعتها للاطفال اكتشفت ان 
كل طفل بيمر فى حياته بمراحل من الفضول و الاهتمام الفكرى لتعلم شىء معين
المراحل دى اسمها الفترات الحساسة " sensitive periods "
و الفرصة دى مش بتيجى مرتين !

عشان كده من المهم اننا نفهم العملية دى لان كل مرحلة بتمثل فرصة لو استغليناها كويس هاتأثر كتير على تطور الطفل
و د/ ماريا وضحت كذا مرحلة بيمر بيها الطفل من ساعة ما يتولد لحد عمر 6 سنوات لازم ناخد بالنا منهم عشان نقدر نساعدهم و ندعم تطورهم فى كل مرحلة
لان اى حاجة الطفل هايتعلمها ف السن ده هو الاساس اللى هايتبنى عليه اى حاجة بعد كده
.
.
.
بنعرف كل مرحلة بإن الطفل بيكون متحفز و متحمس ناحية تعلم حاجة معينة بيكررها كل يوم من غير ملل ولا تعب
المرحلة دى بيحاول يتعلم فيها حاجة جديدة او يكتسب مهارة جديدة او ينمى قدراته العقلية بسهولة ، و اول ما يحقق اللى هو عايزه ده المرحلة بتنتهى
يعنى الطفل لو ماتعرضش للخبرة و المحفز الصح ف الوقت الصح ، هاتفوت عليه فرصة انه يتعلم الحاجة دى بسهولة
زى مثلا تعلم اللغات بيكون سهل بالنسبة للاطفال ف المراحل الحساسة دى ، بينما لو احنا الكبار حاولنا نتعلم لغة جديدة ده هايحتاج مننا مجهود كبير

و نخلى بالنا ان بداية كل مرحلة و انتهاءها بتختلف من طفل للتانى عشان كده الموضوع كله هايعتمد على ملاحظتنا احنا الكبار لسلوك الطفل 


دلوقتى هاعرض لكم المراحل الحساسة اللى قالت عليها د/ ماريا منتسورى :
.
.
.

1- الحركة Movement


- من الولادة لحد عام
- الحركات العشوائية للطفل بتصبح منسقة و متحكم فيها اكتر بيبدأ مثلا انه يقبض ايده .. يلمس .. يلف جسمه .. يوازن نفسه .. يزحف .. ثم يمشى

.
.
.
2- اللغة Language

- من الولادة لحد 6 سنوات
- بيبدأ الطفل انه يصدر اصوات فقط .. بعدين حروف مكررة زى ببببب , دادادادا ... بعدين كلمات منفصلة .. بعدين عبارات بسيطة .. بعدين جمل طويلة
.
.
.
3- الاجسام الصغيرة Small objects

- من سنة لحد اربع سنوات
- الطفل بيبدأ يحب الاجسام الصغيرة بتفاصيلها الدقيقة و وقتها بيكون التناسق بين العين و الايد اصبح اكثر دقة
.
.
.
4- الترتيب Order

- من سنتين لحد اربع سنوات
- كل حاجة لازم يكون ليها مكان محدد .. المرحلة دى بتتميز بحب الطفل للروتين و انه يحافظ على عادات يومية ثابتة

.
.
.
5- الموسيقى Music

- من سنتين لحد 6 سنوات
- الطفل بيبدى اهتمام للاصوات و الايقاعات و الالحان

.
.
.
6- المرحاض Toileting


- من سنة و نصف لحد ثلاث سنوات
- لان وقتها الجهاز العصبى بيكون متطور كفاية انه يتحكم فى المثانة و حركة الامعاء

.
.
.
7- الاتيكيت و المجاملة grace and courtesy

- من سنتين لحد 6 سنوات
- الطفل بيحب يقلد التصرفات المهذبة و المراعية لمشاعر الاخرين و ده بيؤدى لترسخ التصرفات و القيم دى ف شخصيته

.
.
.
8- الحواس Senses

- من سنتين لحد 6 سنوات
- التعليم الحسى بيبدأ من الولادة ، لكن بداية من عمر سنتين الطفل بيبدأ يستمتع بالخبرات الحسية اللى بيكتسبها بحواسه الخمسة

.
.
.
9- الكتابة Writing

- من ثلات سنوات لحد اربع سنوات
- د/ماريا اكتشفت ان الكتابة بتسبق القراءة و بتبدأ عند الطفل بمحاولاته انه يكتب الحروف و الاقام بشكل صحيح بالقلم

.
.
.
10- القراءة Reading

- من تلات سنوات لحد خمس سنوات
- الطفل بيبدى اهتمام متواصل بالحروف و الاصوات اللى بترمز ليها و بعديها بيبدأ هو ينطق الكلمات

.
.
.
11- العلاقات المكانية spatial relationships


- من اربع سنوات لحد 6 سنوات
- الطفل بيفهم العلاقات المكانية و بيهتم انه يحل البازل المعقدة

.
.
.
12- الرياضيات Mathematics

- من اربع سنوات لحد 6 سنوات
- ف الوقت ده الطفل بيبدى اهتمام بالارقام و الكميات ، و د/ماريا اخترعت طرق تتيح للطفل خبرات متميزة ف الرياضيات هاذكرها ف تدوينات قادمة ان شاء الله


.
.
.
الى هنا تنتهى تدوينة انهردة
يلا كل واحد يقولى ف كومنت طفله فى انهى مرحلة دلوقت و اهتمامه حاليا مركز على تعلم ايه بالظبط بناءا على ملاحظتكم
و اى حد عنده استفسار انا فى الخدمة :)


الصور و الموضوع ده مترجم بتصرف من كتاب " How to raise an amazing child- the montessori way " لمؤلفه Tim Seldin 
رئيس مؤسسة منتسورى و رئيس مجلس منتسورى العالمى

الرفع و الترجمة مجهود شخصى .. لذا برجاء ذكر المصدر عند نقل او استخدام الموضوع

إجمالي مرات مشاهدة الصفحة